Ewos vun Fußbolle
Dar Fall gesetzt, dor Fußbollsport
kann dich nich intressiere,
un du willt trutzdam Sunnjens dich
e wengchen amesiere -
Nu jedenfolls, do kimmste mit
ins Stadjon, de veeln Leite,
un monche Menschen siehste hie
mo von dor annern Seite.
Gor monche Weibsen sinnje bal
eefelljer wie de Monnsen.
(Nu wenn die wißten, wiese da
ehr schiens Gesicht verhunnsen!)
E Narvenkitzel, wie das ist,
da sin vielleicht Momente:
Simtausend Menschen uffgereecht -
wenn dos e Tur - das kennte -
Dos kennte de Entscheidung sei, -
das mißter mitdorlaawe!
Un war ben Fußboll noch so dumm -
be suwas, konnt morsch gloowe -
De warscht bestimmt mit ongesteckt,
wenn de drinne in Gewimmel.
Un wenn nahm dir noch eener stieht
mit 'n richtjen Fußbollfimmel.
Do wars gefahrlich, denn dar braucht
'n Platz for sich olleene.
Dar mocht vun drinne alles nooch,
un wenn dar mit sein ' Beene.
Su pucht un stußt dich aus Versahn
an deine zoorte Wade -
mor weß nich, wie de eigestellt,
ab dirsch gefällt nu grode.
Nu jedenfalls, wennde su hierscht
das Schrein un das Getute,
de denkst nich annersch, die sin narrsch
un reif schunn halb noch Rude!
De Jung, die kullern sich for lang
glei fimfmo rim in Sande
Ben Siegsture - Jong un Alt
is außer Rand un Bande!
Un das is immer intressant,
un teetense verliere -
hee wosde do for effelj Zeig
aus ierschter Hand konnte hiere!
"Dor Schiedsrichter hätt' nicht getoocht,
de Speeler, die Bonausen!"
De besten Leite, die wos kunn, -
dos hierschte, die stiehn - draußen!
Dr. Angelika Diesener / Horst Schumann / Willy Wattersch
dorzohlt putzjes Zeig un annere Sachen
(Altenburger Dialekt)
ansonsten unbekannt.
|
